Рыгор Мінавіч Яўсееў (таксама Яўсееў Ягор) нарадзіўся 10 верасня 1942 года ў вёсцы Барок Бялыніцкага раёна ў сялянскай сям’і. Пасля заканчэння Мала-Бялевіцкай СШ працаваў у калгасе.
У 1969 годзе закончыў Магілёўскі педінстытут, у 1973 годзе – Мінскую партыйную школу.

Працаваў у Бялыніцкай раённай газеце “Зара камунізму”, часопісе “Полымя” (1973-1975), Дзяржвыдавецтве БССР (1975-1977), з 1977 года - старшы рэдактар выдавецтва «Мастацкая літаратура».
Першыя творы (гумарыстычныя вершы і байкі) з’явіліся ў 1960 годзе ў раённай газеце “Зара камунізму”.

З 1961 года друкаваўся ў “Магілёўскай праўдзе”, рэспубліканскім перыядычным друку.
Пісаў сатырычныя і гумарыстычныя вершы, байкі, вершаваныя фельетоны, якія змяшчаліся ў “Вожыку”.
Аўтар зборнікаў “Верабей пад воблакам” (1976), “Гатовая рэпка” (1976), “Вялікая лыжка” (1977), “Мох на бярвенні” (1979), “Шаравая бліскавіца” (1986).
У сваіх творах выкрываў лайдакоў, п’яніц, раскрадальнікаў народнага дабра, хабарнікаў, аматараў пажывіцца за чужы кошт.
У 1978 годзе выйшаў яго дыялектны слоўнік гаворак жыхароў Бялыніцкага раёна “Маці казала так”.
Для дзяцей напісаў кнігі “Нашы хлопцы-рыбакі” (1976), “Дзядзькавы памочнікі” (1981).
Перакладаў на беларускую мову вершы рускіх і ўкраінскіх паэтаў.
Рыгор Мінавіч Яўсееў памёр 26 снежня 2004 года.